काठमाडौँ : नेपाल बैंकर्स संघका अध्यक्ष सन्तोष कोइरालाले अहिले बैंकिङ प्रणालीमा ठूलो परिमाणमा निक्षेप भए पनि कर्जा विस्तारको गति कमजोर रहेको बताएका छन् ।
नागरिक लगानी कोषको ३६औँ वार्षिकोत्सवलाई सम्बोधन गर्दै उनले हाल बैंकहरूसँग करिब ७७ खर्ब रुपैयाँ निक्षेप रहेको बताएका हुन् । अध्यक्ष कोइरालाले सो मध्येबाट बैंकहरूले ५८ खर्ब रुपैयाँ जति कर्जा प्रवाह गरेको जानकारी दिँदै पछिल्लो समय कर्जा प्रवाहको वृद्धि दर बढ्न नसकेको बताएका छन् ।
कोइरालाले कर्जा सुस्तता आउनुको कारण भने खुलाएनन् । उनले बैंकिङ क्षेत्रमा विभिन्न प्रकारका चुनौतीहरू रहेको पनि बताए । उनका अनुसार कर्जा असुलीका क्रममा बैंकका कर्मचारीहरूले विभिन्न धम्की र दबाब सामना गर्नुपरेको छ । बैंकर्स संघले पनि यस विषयमा अझ सक्रिय भएर अघि बढ्नुपर्ने अवस्था आएको उनको भनाइ छ ।
कोइरालाले भने, ‘अहिले बैंकसँग ७७ खर्बको डिपोजिट छ । ५८ खर्ब जति लोन प्रवाह गरेका छौँ । कर्जा प्रवाहको ग्रोथ बढ्न सकिरहेको छैन । बैंकिङ क्षेत्रमा विभिन्न प्रकारका चुनौतीहरू छन् । ऋण उठाउन जाने क्रममा धेरै प्रकारका थ्रेटहरू छन् । बैंकर्स संघले अलिकति अघि बढ्नुपर्ने अवस्था पनि आइरहेको छ । कुनै भीडले बैंकको पैसा तिर्नु पर्दैन भन्ने कुरा आयो भने यसले समग्र अर्थतन्त्रलाई असर पार्छ । पैसा तिर्नु पर्दैन भन्ने भाष्य बन्ने र कर्मचारीलाई विभिन्न प्रकारका थ्रेटहरू जस्तै कालोमोसो दल्ने, जुत्ता माला लगाउने जस्ता घटना देखिएका छन् । यस्तो खालको कुरा आयो भने भविष्यमा हाम्रो अर्थतन्त्रका लागि राम्रो हुँदैन ।’
उनका अनुसार ‘ऋण तिर्नु पर्दैन’ जस्ता भाष्य बनाउन खोजिएको छ । यस्ता गतिविधि र गलत सन्देश फैलिन थालेमा भविष्यमा नेपालको अर्थतन्त्रका लागि राम्रो संकेत नहुने उनले बताए ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
