काठमाडौं : देशको सबैभन्दा पुरानो सञ्चार गृह गोरखापत्र संस्थानले औपचारिक रूपमा सामाजिक सुरक्षा कोषमा आबद्ध हुने निर्णय गरेको छ। मङ्सिर १० गते महाप्रबन्धक लालबहादुर ऐरीको अध्यक्षतामा बसेको सञ्चालक समितिको बैठकले यस कदमको औपचारिक स्वीकृति दिएको हो।
यस निर्णय पश्चात् अस्थायी कर्मचारीसहित करिब १५४ जना प्रत्यक्ष रूपमा सामाजिक सुरक्षा सुविधाको लाभ पाउनेछन्। महाप्रबन्धक ऐरीका अनुसार, संस्थानको दिगो विकास र कर्मचारीको भविष्य सुरक्षालाई दृष्टिगत गर्दै यो कदम चालिएको हो।
२०८२ मङ्सिर ११ गते, प्रधानमन्त्री सुशीला कार्की र सञ्चार तथा सूचना प्रविधि मन्त्री जगदीश खरेलको उपस्थितिमा, गोरखापत्र संस्थान र सामाजिक सुरक्षा कोषबीच समझदारी पत्र आदानप्रदान गरिएको छ। हस्ताक्षर संस्थानका महाप्रबन्धक ऐरी र कोषका कार्यकारी निर्देशक कविराज अधिकारीले गर्नुभएको थियो।
अब गोरखापत्र संस्थानका कर्मचारीहरू स्वास्थ्य सुरक्षा, मातृत्व सुविधा, दीर्घकालीन पेन्सन, दुर्घटना सुरक्षा लगायतका योजनामा सहभागी हुनेछन्। यसै सन्दर्भमा ‘सामाजिक सुरक्षाः सर्वव्यापी स्वास्थ्य सेवाको पहुँच, पेन्सनयोग्य समाज र उत्पादकत्व अभिवृद्धिसहित नागरिक जीवनको रक्षा’ भन्ने नाराका साथ आठौँ सामाजिक सुरक्षा दिवस देशभर मनाइएको थियो।
सरकारले सार्वजनिक र निजी सबै संस्थालाई उत्पादनमूलक र समतामूलक श्रम सम्बन्ध निर्माणका लागि सामाजिक सुरक्षा प्रणालीमा सहभागी हुन प्रोत्साहित गर्दै आएको छ। गोरखापत्र संस्थानको यो कदमले सञ्चार क्षेत्रका अन्य निकायलाई पनि प्रेरणा दिने विश्वास व्यक्त गरिएको छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
