कैलाली : कैलालीको टीकापुरमा 'टीकापुर साहित्य महोत्सव २०८२' को तेस्रो संस्करण शुक्रवारदेखि सुरु भएको छ । टीकापुर साहित्य समाज र सुदूरपश्चिम प्रज्ञाप्रतिष्ठानको संयुक्त आयोजनामा सुरु भएको त्रिदिवसीय महोत्सव यसपटक ‘थारु साहित्य तथा सांस्कृतिक उत्सव’ का रूपमा केन्द्रित गरिएको छ ।
सुदूरपश्चिम विश्वविद्यालयका उपकुलपति प्राडा हेमराज पन्त लगायत अतिथिहरूले पानसमा दियो बालेर महोत्सवको औपचारिक उद्घाटन गरे । सोही अवसरमा महोत्सवको स्मारिकासमेत विमोचन गरिएको थियो ।
त्यसअघि महोत्सवको सुरुआत प्रसिद्ध नाट्यकर्मी अशेष मल्लको संयोजनमा टीकापुरका स्थानीय कलाकारहरूको नाट्य प्रस्तुतिमार्फत् भएको थियो । चैत १५ गतेसम्म हुने यस महोत्सवमा भाषा, साहित्य, कला, संगीत र समसामयिक मुद्दाहरूमा आधारित २७ वटा विभिन्न सत्रहरू सञ्चालन हुने आयोजकले जनाएका छन् ।
महोत्सवको मुख्य आकर्षणका रूपमा कर्णालीमा जलविहार, थारु सांस्कृतिक नाच, सडक नाटक, लेखन कार्यशाला र सुदूरपश्चिमको मौलिक देउडा खेललाई समावेश गरिएको छ । विशेषगरी लोपोन्मुख अवस्थामा रहेको थारु समुदायको रामलीला नाच प्रदर्शन गर्नु यस वर्षको विशेष कार्यक्रम रहेको छ ।
महोत्सवका संस्थापक संयोजक महेशविक्रम शाहका अनुसार थारु समुदायको समृद्ध मौलिकता, परम्परा र जीवनशैलीलाई राष्ट्रिय विमर्शको केन्द्रमा ल्याउनु यस महोत्सवको मूल उद्देश्य हो । ‘थारु समुदायको वैभवशाली संस्कृति प्रवर्द्धन गर्नु हाम्रो कर्तव्य हो,’ शाहले भने ।
महोत्सवमा देशका प्रतिष्ठित भाषाविद्, साहित्यकार, कलाकार र चिन्तकहरूको सहभागिता रहेको छ । यसअघि महोत्सवको पूर्वसन्ध्यामा चैत ७ गतेदेखि नै नाट्य कार्यशाला र चैत ९ देखि ११ गतेसम्म साहित्यकार नीलम कार्की निहारिका र केशव दाहालको सहजीकरणमा लेखन कार्यशाला सम्पन्न भइसकेका छन् ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
