काठमाडौँ : गरिमा विकास बैंक लिमिटेडले आफ्नो पहिलो खुलामुखी सामूहिक लगानी कोषको रूपमा ‘गरिमा सुवर्ण योजना’ सार्वजनिक गर्ने भएको छ।
गरिमा म्युचुअल फण्ड अन्तर्गत सञ्चालन हुने सो योजनालाई सार्वजनिक रूपमा निष्काशन गर्न नेपाल धितोपत्र बोर्डले स्वीकृति प्रदान गरेको छ।
गरिमा विकास बैंक लिमिटेड कोष प्रवर्द्धक र बैंकको सहायक कम्पनी गरिमा क्यापिटल लिमिटेड योजना व्यवस्थापक रहेको यस योजनाको कुल आकार १ अर्ब रुपैयाँ बराबरको रहेको छ।
धितोपत्र बोर्डबाट अनुमति पाएसँगै अब बैंकले पहिलो चरणमा ५ करोड इकाईहरू सर्वसाधारणका लागि बिक्री खुल्ला गर्ने तयारी गरेको छ।
प्रति इकाई १० रुपैयाँका दरले कुल ५० करोड रुपैयाँ बराबरको इकाई निष्काशन गरिने यस योजनामा लगानीकर्ताहरूले न्यूनतम १०० इकाईदेखि अधिकतम ५० लाख इकाईसम्मका लागि आवेदन दिन सक्नेछन्।
खुलामुखी योजना भएकाले यसमा लगानीकर्ताले योजना व्यवस्थापकबाटै इकाईहरू खरिद–बिक्री गर्न सक्ने सुविधा रहने कम्पनीले जनाएको छ ।
गरिमा विकास बैंकले यसअघि नै १ अर्ब २५ करोड रुपैयाँ बराबरको बन्दमुखी सामूहिक लगानी कोष योजना ‘गरिमा समृद्धि योजना’ सफलताका साथ सञ्चालन गरिरहेको छ। सोही क्रमलाई निरन्तरता दिँदै बैंकले नयाँ योजना ल्याउन लागेको बैंकका नायब प्रमुख कार्यकारी अधिकृत अनिल रेग्मीद्वारा जारी विज्ञप्तिमा उल्लेख छ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
