बाजुरा : हिमाली गाउँपालिका–६ धुलाचौरमा सुविधा सम्पन्न तीनतले स्वास्थ्यचौकी भवन निर्माण भएपछि दुर्गमका स्थानीयलाई स्वास्थ्य सेवा लिन निकै सहज भएको छ। पहिले कच्ची संरचनाले सेवा दिन कठिन हुने गरेको अवस्थामा अब गर्भवती, दीर्घरोगी तथा सम्भावित आकस्मिक बिरामीलाई गाउँमै उपचार सम्भव भएको स्थानीयले बताएका छन्।
पहिले सामान्य उपचारका लागि समेत कोल्टी जानुपर्थ्यो भने बीचमै सुत्केरी हुने अवस्थासमेत देखिन्थ्यो। नयाँ भवनमा र्याम्प, ह्वीलचेयर पहुँच, सहयोगी बस्ने व्यवस्था सहित आवश्यक उपचार कक्ष सहज रूपमा उपलब्ध छन्।
धुलाचौर स्वास्थ्यचौकीका प्रमुखका अनुसार अब सबै प्रकारका बिरामीलाई गुणस्तरीय सेवा दिन सकिने अवस्था बनेको छ।
यो भवन स्थानीय तह र संघीय सरकारको गरी करिब दुई करोड लगानीमा आर्थिक वर्ष २०८०/८१ मा निर्माण सम्पन्न भएको हो। हिमाली गाउँपालिकाले प्रत्येक वडामा स्वास्थ्य पूर्वाधार सुदृढीकरणलाई प्राथमिकतामा राखेपछि अधिकांश स्वास्थ्य भवनहरू सुविधा सम्पन्न बन्दै गएका छन्।
