एन्टवर्प : भारतको पञ्जाब नेशनल बैंक ऋण ठगी मुद्दाका फरार अभियुक्त हीरा व्यापारी मेहुल चोक्सीलाई बेल्जियमको प्रहरीले पक्राउ गरेको छ। भारतीय अनुसन्धान एजेन्सीहरूको प्रत्यर्पण अपिलमा उनलाई अप्रिल १२ मा पक्राउ गरिएको थियो र हाल उनी जेलमा रहेको भारतीय सञ्चारमाध्यमले बताएका छन् । भारतले बेल्जियमसँग मिलेर चोक्सीको सुपुर्दगीको प्रक्रिया सुरु गरेको छ।
चोक्सीलाई पक्राउ गर्दा प्रहरीले दुईवटा पक्राउ वारेन्ट जारी गरेको थियो। यी मुम्बई अदालतले जारी गरेका थिए। वारेन्टहरू मे २३, २०१८ र जुन १५, २०२१ मा जारी गरिएको रिपोर्टमा उल्लेख छ। चोक्सीले आफ्नो खराब स्वास्थ्यको कारण देखाउँदै जमानत र तत्काल रिहाइको माग गर्न सक्ने विश्वास गरिएको छ। उनले आफू उपचारको लागि बेल्जियम आएको र आफ्नी श्रीमतीसँग एन्टवर्पमा बस्दै आएको बताएका छन् ।
चोक्सीमाथि १३ हजार ८५० करोड रुपैयाँको घोटाला गरेको आरोप छ। गत महिना मेहुल बेल्जियममा रहेको खुलासा भएको थियो। रिपोर्टका अनुसार मेहुल आफ्नी श्रीमती प्रीति चोक्सीसँग बसिरहेका थिए, जसले बेल्जियमको नागरिकता पाइसकेकी छन्। चोक्सीको उपस्थितिको बारेमा जानकारी बेल्जियमको विदेश मन्त्रालयले दिएको थियो। स्रोतका अनुसार मेहुल बेल्जियमबाट स्विट्जरल्याण्ड भाग्न खोजिरहेका थिए।
चोक्सीका वकिल विजय अग्रवालले अब जमानतको लागि अपिल दायर गर्ने बताएका छन्। यस अवधिमा, उनले आफूलाई हिरासतमा राख्नुहुँदैन र जेल बाहिर रहँदा आफूलाई बचाउ गर्न र सुपुर्दगी अपिलको विरोध गर्न अनुमति दिइनुपर्छ भनेर पनि अपिल गर्नेछन्।
वकिलले अपिलमा चोक्सी भाग्ने कुनै जोखिम छैन भनेर उल्लेख गरिने पनि स्पष्ट पारेका छन् । उनले भने, ‘उहाँ धेरै बिरामी हुनुहुन्छ र क्यान्सरको उपचार गराइरहनुभएको छ। यो मुद्दा राजनीतिक मुद्दा हो र भारतीय जेलहरूको अवस्था धेरै खराब छ।’
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
