काठमाडौं : केही हप्ता अघि फस्टलुक पोस्टर सार्वजनिक गर्दै प्रचार अभियान थालेको फिल्म ‘हेल्लो काँशीराम’ को निर्माण टिमले प्रचारलाई आक्रामक बनाउँदै लगेको छ। आगामी जेठ २ गते लाई प्रदर्शन मिति तोकिएको फिल्मको गीत ‘झ्यामकी मादल झ्याम’ को छायांकनका केही तस्बिर सार्वजनिक गरिएका छन्, जसमा अभिनेता दिलिप रायमाझीसँग अभिनेत्री प्रियंका कार्कीले नृत्य गरिरहेको देख्न सकिन्छ।
काठमाडौंमा आकर्षक सेट बनाएर खिचिएको उक्त गीतमा ६४ जना कोरस डान्सर छन् भने, कोरियोग्राफी कबिराज गहतराजले गरेका छन्। प्रताप दास र मेलिना राईको स्वर रहेको गीतलाई निर्माण टिमले नयाँ वर्षलाई लक्षित गर्दै सार्वजनिक गर्ने तयारी गरिरहेको छ।
अभिनेता दिलिप रायमाझीको मुख्य भूमिका रहेको यस फिल्मको फस्टलुक पोस्टरले दर्शकको ध्यान तानेको छ। पोस्टरमा उनलाई काँधमा बोका बोकेर हिँडिरहेको देख्न सकिन्छ, जसले फिल्म कमेडी शैलीमा निर्माण भएको संकेत गर्छ।
रिम विश्वकर्मा को लेखन तथा निर्देशनमा तयार भएको फिल्ममा दिलिप रायमाझीसहित बरिष्ठ कलाकारहरु सुरवीर पण्डित, रामचन्द्र अधिकारी, सुशील पोखरेल, उमेश राई ‘‘फुलन्देको आमा’, अर्जुन गुरुङ, नवज्योती रसाइली, सुमन खाँण, अजय न्यौपाने, सरोज केसी, उमेश मायालु लगायतका कलाकारको अभिनय छ।
यस फिल्ममा प्रियंका कार्कीको विशेष भूमिका रहेको बताइएको छ, तर निर्माण टिमले यस बिषयमा विस्तृत जानकारी खुलाएको छैन। रेडलाइन फिल्म्सको ब्यानरमा निर्माण भएको फिल्मका निर्माता पी.बी. थापा हुन्। यस फिल्मलाई यम आलेले खिचेका हुन् ।
फिल्ममा द्वन्द्व निर्देशन शंकर महर्जन, सम्पादन मित्र डी. गुरुङ, संगीत संयोजन नरेन्द्र वियोगी, विपिन आचार्यले गरेका छन् । त्यस्तै पार्श्व संगीत शाश्वत श्रेष्ठको रहेको छ । निर्देशक रिम विश्वकर्माले फिल्म कमेडी जनरामा निर्माण भए पनि केही भावनात्मक पक्षसमेत समेटिएको बताएका छन्। उनका अनुसार फिल्मको सम्पादनको सम्पुर्ण काम सकिएको र केही हप्ताभित्र सार्वजनिक गर्ने तयारी भईरहेको बँताउछन ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
