चितवनमा सन् २०२६ को जनवरीदेखि हालसम्म ८० जना नयाँ एचआईभी सङ्क्रमित फेला परेका छन् । जोखिममा रहेका समूहमा गरिएको परीक्षणका क्रममा उनीहरूमा सङ्क्रमण पुष्टि भएको हो ।भरतपुर अस्पतालस्थित एड्स हेल्थ फाउन्डेसनले २२३ जनामा गरेको परीक्षणका क्रममा ८० जनामा एचआईभी सङ्क्रमण देखिएको जनाएको छ । यस अवधिमा नयाँ भेटिएका सङ्क्रमितसहित ९१ जना नयाँ बिरामीले एचआईभीविरुद्धको एआरटी औषधि सेवन गर्न थालेका छन् । औषधि सेवन सुरु गरेकामध्ये ११ जना जिल्लाबाहिरबाट आएका हुन् ।यससँगै फाउन्डेसनबाट नियमित रूपमा एआरटी औषधि सेवन गर्नेको सङ्ख्या एक हजार २९३ पुगेको छ ।
भरतपुर अस्पतालका फिजिसियन डा. प्रमोद पौडेलका अनुसार एचआईभी सङ्क्रमितसहित अन्य व्यक्तिमा गरिएको यौन रोग परीक्षणका क्रममा एक हजार १६१ जनामध्ये ५२ जनामा यौन रोगको सङ्क्रमण देखिएको छ । सङ्क्रमण पुष्टि भएकाहरूको उपचार गरिएको उनले जानकारी दिए ।
उनका अनुसार सरकारी तवरबाट कन्डम उपलब्ध हुन नसक्दा सुरक्षित यौन व्यवहारमा चुनौती थपिएको छ । यसका कारण यौन रोग तथा भिरिङ्गीका सङ्क्रमितसमेत भेटिएको उनले बताए ।एचआईभी सङ्क्रमितमा क्षयरोगको समस्या पनि देखिने गरेको डा. पौडेलले बताए । उनका अनुसार १४८ जनाको खकार परीक्षण गर्दा १५ जनामा क्षयरोग पुष्टि भएको छ ।यसैबीच, जनवरीदेखि हालसम्म नियमित औषधि सेवन गरिरहेका तीन जनाले औषधि लिन छाडेको र उनीहरू सम्पर्कमा समेत नआएको फाउन्डेसनले जनाएको छ । एचआईभी सङ्क्रमितको स्वास्थ्य अवस्था सुधार गर्न नियमित औषधि सेवन र स्वास्थ्यकर्मीसँगको सम्पर्क आवश्यक रहेको स्वास्थ्यकर्मीले बताएका छन् ।
फाउन्डेसनका कार्यक्रम संयोजक कृष्णहरि सापकोटाका अनुसार औषधि लिन आउने गरिब, वृद्धवृद्धा तथा एकल महिलासहित एक हजार २११ जनालाई यातायात, प्रयोगशाला परीक्षण, पोषण, औषधि तथा आकस्मिक सेवामा सहयोग प्रदान गरिएको छ ।उनले नियमित रूपमा एआरटी औषधि सेवन गर्दा एचआईभीलाई प्रभावकारी रूपमा नियन्त्रण गर्न सकिने बताए । स्वास्थ्य सेवामा पहुँच बढाउने, नियमित परीक्षण गर्ने र सङ्क्रमितलाई आवश्यक उपचार तथा सहयोग उपलब्ध गराउने कार्यले एचआईभी नियन्त्रणमा सहयोग पुग्ने स्वास्थ्यकर्मीको भनाइ छ ।
