कुुरिनटार :  सशस्त्र प्रहरी बल, नेपाल विपद् व्यवस्थापन तालिम शिक्षालय कुरिनटारले आफ्नो २१ औँ स्थापना दिवस मनाएका छन् । सशस्त्र प्रहरी अतिरिक्त महानिरीक्षक वंशीराज दाहालको प्रमुख आतिथ्यतमा एक समारोहका बिच स्थापना दिवस मनाएका हुन् ।  कार्यक्रममा विपद् व्यवस्थापनका नमूना अभ्यास सहित विभिन्न सांस्कृतिक कार्यक्रमहरु प्रस्तुत गरेका थिए । साथै शिक्षालयका गोताखोर टिम र विभिन्न गतिविधिहरुमा उत्कृष्ट हुने सदस्यहरुलाई सम्मान गरिएको थियो । कार्यक्रममा प्रमुख अतिथि सशस्त्र प्रहरी अतिरिक्त महानिरीक्षक वंशीराज दाहालले  शुभकामना सहित निर्देशनात्मक मन्तव्य राख्नुभएको थियो । साथै विशिष्ट अतिथि इच्छाकामना गाउँपालिका अध्यक्ष दान बहादुर गुरुङले शुभकामना मन्तव्य राख्नु भएको थियो ।

कार्यक्रममा शहिद लखन गाउँपालिका अध्यक्ष रमेश बाबु थापा मगर, इच्छाकामना गाउँपालिका उपाध्यक्ष माया सिलवाल, प्रमुख प्रशासकिय अधिकृत चन्द्रकान्त बस्नेत,इच्छाकामना ४ का वडा अध्यक्ष रुद्र प्रसाद उप्रेती लगायतको आतिथ्यता रहनुभएको थियो । चितवनको इच्छाकामना ४ कुरिनटारमा रहेको यस शिक्षालय वि.स. २०५८ साल मंसिर २४ गते वेश क्याम्पको रुपमा स्थापना भई हाल सशस्त्र प्रहरी बल, नेपाल विपद् व्यवस्थापन तालिम शिक्षालयको रुपमा सञ्चालनमा रहेको छ ।  शिक्षालयका समादेशक सशस्त्र प्रहरी वरिष्ठ उपरिक्षक माधव प्रसाद पौडेलका अनुसार  यस शिक्षालयले विपद् व्यवस्थापन सम्बन्धी उन्नत एवम् व्यवसायिक तालिम  प्रदान  गरि विपद् व्यवस्थापनमा दक्ष, सक्षम र कर्मठ जनशक्ति उत्पादन गर्ने  उदेश्यलाई जोड दिएको छ ।

यस शिक्षालयले स्थापनाकालदेखि हाल सम्म ५४ वटा विपद् व्यवस्थापन तालिम सम्पन्न गरि दुई हजार ६६७ जना दक्ष जनशक्ति उत्पादन गरेका छन् । साथै ३ वटा गोताखोर तालिम सञ्चालन गरि ५८ जना गोताखोर तथा देशका विभिन्न स्थानहरुमा विद्यालय, नगर प्रहरी संघ संस्था र समुदायहरुमा आधारित ४५ वटा समुदायमा स्वंयसेवक विपद् व्यवस्थापन तालिम सञ्चालन गरि एक हजार ७८४ जना नागरिकहरुलाई सीप ज्ञान प्रदान गराइएको छ । यस शिक्षालयले जनशक्ति परिचालन गरि ३६२ वटा विपद्का घटनाहरुमा पाँच हजार ४८४ जनाको संख्यामा देशका विभिन्न स्थानहरुमा दक्ष जनशक्ति परिचालन गरि ९२८ जनाको जिवित उद्धार र ३९६ जनाको शव रिकभर गरिएको जनाएको छ । साथै विभिन्न सामाजिक क्रियाकलाप अन्तरर्गत हाल सम्म ६ पटक रक्तदान कार्यक्रम गरि  १९८ जनाले रक्तदान समेत गरेको शिक्षालयले जनाएको छ । शिक्षालय परिसरमा पृथ्वी हाइवे ट्रमा सेन्टर समेत सञ्चालनमा रहेको छ ।