चितवन : चितवनमा क्यान्सर उपचारका लागि अत्यावश्यक किमोथेरापी औषधि कार्बोप्लाटिन र सिसप्लाटिनको अभाव भएपछि बिरामी र उनीहरूका परिवार समस्यामा परेका छन्। भरतपुरस्थित बीपी कोइराला मेमोरियल क्यान्सर अस्पताल मा उपचारका लागि आएका बिरामीहरू उपचारभन्दा बढी औषधिको खोजीमा भौतारिन बाध्य भएका छन्।
चिकित्सकहरूका अनुसार विश्वव्यापी रूपमा सक्रिय कच्चा पदार्थ (एपीआई) को अभाव, मूल्यवृद्धि तथा ढुवानी लागत बढ्दा उत्पादन प्रभावित भएको हो। नेपालमा मूल्य समायोजन हुन नसक्दा आयात पनि घटेको छ।
औषधि व्यवस्था विभागले देशभरका ११ स्वास्थ्य संस्थामार्फत आपूर्ति व्यवस्था गरे पनि मागअनुसार औषधि उपलब्ध हुन सकेको छैन। चितवनमा भरतपुरको राज ड्रग प्रालिलाई जिम्मेवारी दिइएको भए पनि आपूर्ति न्यून रहेको जनाइएको छ। अस्पतालका मेडिकल अन्कोलोजी विभाग प्रमुख डा. गुरुशरण साहका अनुसार किमोथेरापी गर्ने अधिकांश बिरामीलाई यी औषधि आवश्यक पर्छ, तर हाल उपलब्धता मागको आधा मात्र छ। उनका अनुसार बजारमा देखिएको अभावका कारण उपचार व्यवस्थापन नै प्रभावित भएको छ।
बिरामी तथा उनीहरूका परिवारले औषधि खोज्दै विभिन्न स्थान धाउनुपर्ने अवस्था सिर्जना भएको छ। चिकित्सकहरूले गुणस्तरहीन वा अनधिकृत औषधि प्रयोग नगर्न आग्रह गर्दै यसले उपचारमा जोखिम बढाउन सक्ने चेतावनी दिएका छन्। विशेषज्ञहरूका अनुसार यी औषधिको प्रभावकारी विकल्प नभएकाले दीर्घकालीन समाधानका लागि आपूर्ति व्यवस्थापन र मूल्य समायोजन आवश्यक रहेको बताएका छन्।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
