मस्को : लामो समयदेखि युद्धको चपेटामा परेका युक्रेन र रूसले शुक्रबार ठुलो संख्यामा युद्धबन्दीहरूको आदानप्रदान गरेका छन्। दुवै पक्षले आ-आफ्नो नियन्त्रणमा रहेका १९३–१९३ जना सैनिक र सुरक्षाकर्मीहरूलाई रिहा गरेको पुष्टि गरेका हुन्।
यो मानवीय कार्यमा संयुक्त राज्य अमेरिका र संयुक्त अरब इमिरेट्स (युएई) ले सहजकर्ताको भूमिका निर्वाह गरेका थिए। युक्रेनी राष्ट्रपति भोलोडिमिर जेलेन्स्कीले टेलिग्राममार्फत आफ्ना नागरिकहरू घर फर्किएकोमा खुसी व्यक्त गर्दै यो प्रक्रिया निकै महत्त्वपूर्ण रहेको बताएका छन्।
उनका अनुसार स्वदेश फर्कनेहरूमा सेना, सीमा सुरक्षा गार्ड र प्रहरी अधिकारीहरू रहेका छन्। फर्किएकामध्ये कतिपय घाइते छन् भने कतिपयले रूसमा आपराधिक मुद्दा समेत खेपेका थिए। युक्रेनका गुप्तचर प्रमुख किरिलो बुडानोभ र रूसी रक्षा मन्त्रालय दुवैले यो जटिल प्रक्रियामा अमेरिका र यूएईको सहयोग रहेको स्वीकार गरेका छन्।
युक्रेनतर्फ फर्किएका कैदीहरू बसबाट ओर्लदै गर्दा निकै भावुक देखिन्थे। आफ्नो देशको झण्डा ओढेर घर फर्किने क्रममा धेरैका आँखा रसाएका थिए। तीन वर्षसम्म रूसी कैदमा रहेका सेर्ही नामका एक सैनिकले आफू स्वदेश फर्किएको अझै विश्वास नलागेको बताउँदै आफ्नै देशको आकाश र रुखहरू देख्न पाउनु नै वास्तविक सुख भएको प्रतिक्रिया दिएका छन्।
चार वर्षदेखि जारी यस युद्धमा दुवै देशले पटक-पटक कैदी साटासाट गर्दै आएका छन्। यसअघि पनि हजारौँको संख्यामा युद्धबन्दीहरू आदानप्रदान भइसकेका छन्।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
