रौतहट : जितिया पर्वको ‘नहायखाय’ अनुष्ठानका लागि लाल बकैया नदीमा नुहाउन गएकी एक बालिकाको डुबेर मृत्यु भएको छ। गौर नगरपालिका–६ निवासी बैजु साहकी १० वर्षीया छोरी करिश्मा (अमृता) साह शनिबार बिहान नदीमा बेपत्ता भएकी थिइन्।
आमा र अन्य व्रतालुसँगै स्नान गर्न गएकी साहलाई नेपाली सेनाले घन्टौँको खोजीपछि मृत अवस्थामा फेला पारेको जिल्ला प्रहरी कार्यालय, रौतहटका प्रवक्ता डीएसपी राजु कार्कीले जानकारी दिए।
यसैगरी, गत बिहीबार सोही नदीमा नुहाउन गएका ईशनाथ नगरपालिका–१ का १५ वर्षीय बिगन साहको पनि शव फेला परेको छ। पाँच जना साथीहरूसँगै गएका उनी बाढीको भेलले बगाउँदा बेपत्ता भएका थिए।
खोजीको तेस्रो दिन उनको शव करिब ८ किलोमिटर दक्षिण भारतको भूभागमा फेला परेको प्रहरीले जनाएको छ। भारतीय भूभागमा भेटिएको शव नेपाल ल्याउनका लागि स्थानीय प्रशासन र परिवारजन भारत पुगेका छन्।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
