१) अनुत्तरित प्रश्न

त्यो

देश र दैत्यको कुस्तीमा

देशलाई

उत्तानो पार्दै

दैत्य

देशलाई घोप्टो पारेर

देशको छातीमा

टेक्तै छ

निरन्तर तिखा–तिखा

नङ्ग्राहरू आइरहेछन्

देशतिरै

क्रमशः

देश र दैत्यको

दूरी घट्दै छ

ल... ल... ल... ऐया !

ए !

दैत्यले फेरि एकपटक

देशलाई

घोप्टो पारेर

छातीमा थिचेको पो रहेछ ।

म

चिच्याएकोमा

नरिसाउनुस् है हजुर

ममा

सदैव एउटा

उत्तर नआएको प्रश्न छ–

दैत्यले आखिर

कहिलेसम्म यसरी निरन्तर

देशको छातीमा टेकिरहने ?

००

२) एक हुल मान्छेहरू

एक हुल मान्छेहरू

आएर आफ्नै छातीमा मुड्की ठोक्तै

एक दिन मसँग

आफैँ आफ्नो परिचय माग्नेछन्

लुगा होउन्जेली त ठिकै छ

तर

च्यातिएको दिन लुगा

ती मान्छेहरू आएर मसँग

ठिङ्ग उभिएर सोध्नेछन्—

कि

हाम्रो भेष कुन हो

र भन्नेछन्

हामीले त

नमुनासम्म राख्न नसकेर

आफ्नो भेषको

कटिङ नै समेत हराएका छौँ

धरती

होउन्जेली त नाच्ने हो

पाइताला पनि

तर

धरती नै गुमाएको दिन

उनीहरूले

मसँग भन्नेछन्

एकोहोरो नाच्ने धुनमा

हामीले त नाच्नलाई

खुट्टा मात्र पर्याप्त ठानेका थियौँ

टेक्ने

एक अंगुल माटोको

अभावमा पनि

नाच्न नसकिने रहेछ

नाच्न

खुट्टा मात्र होइन

टेक्ने जमिनको चाहिँ

जरुरी हुँदोरहेछ

हामीले त नाँच्ने धुनमा

टेक्ने

एक अंगुल

जमिन पनि गुमाएका छौँ

मलाई विश्वास छ कि

एक हुल मान्छेहरू भ्रम टुटेको दिन

मसँग आएर रुने छन्

र भन्ने छन्

खोइ,हाम्रो माटो खोइ ?

खोइ

हाम्रो देश खोइ ??

००

३) रैथाने मालिकहरूलाई

जिताइ

तिम्रो भागमा मात्र पर्छ भने

जित तिमी

मसँगका हरेक लडाइँहरू

मलाई त निरन्तर

हार्ने र

हारिरहने

बानी परेको छ

र रुनु

मेरो नियति बनेको छ

हाँस्नु त केवल

तिम्रो अंशमा न परेको छ

तिम्रा

वैभवका चुचुराहरूलाई

मेरो

हृदयदेखिकै सलाम

म एउटा दासको पवित्र सलोट

तिम्रा उडुसे पेटका

आकांक्षाहरूलाई

आउ

स्वागत छ तिमीलाई

आफ्नो विजयको स्वघोषणा गर्न

म एउटा

दासको लासमाथि

आफ्नो

अमरताको बीज रोप्न

तृप्त होस्

तिम्रो हाँस्ने रहर

म एउटा

गुलामको आँसुमाथि

आउ...

स्वागत छ

तिमीलाई !

तिमी

यस देशका

रैथाने मालिकहरूलाई ।

०००