काठमाडौँ : माधवकुमार नेपालले एमालेसँग विद्रोह गरेर नेकपा एकीकृत समाजवादी गठन गरेको आगामी भदौमा चार वर्ष पुग्दै छ । झन्डै चार वर्षअघि २०७८ साल भदौ २ गते गठन भएको एकीकृत समाजवादीले निर्वाचन आयोगबाट भदौ ९ गते दल दर्ता प्रमाणपत्र पाएको थियो ।

त्यसवेला पार्टी दर्ताका लागि नेताहरू निर्वाचन आयोग पुग्दा नेतृ रामकुमारी झाँक्री पनि अग्रपंक्तिमा थिइन् । झाँक्रीले त्यसवेला नेता माधव नेपालको हात समातेर आयोगको कार्यालय प्रवेश गराएको तस्बिर र भिडियो भाइरल बनेपछि झाँक्रीको चर्चा थप चुलिएको थियो । एकीकृत समाजवादी गठन भएपछि झाँक्री तत्कालीन कांग्रेस माओवादी गठबन्धनमा सहरी विकास मन्त्री बनिन् । तर पार्टीले झाँक्रीसहितका नेताहरूलाई फिर्ता बोलाएर अरू नेताहरूलाई मन्त्री बनाएको थियो । पार्टीको निर्णयपछि काम गर्दागर्दै मन्त्रालय छाड्नुपरेको भन्दै झाँक्रीले पत्रकार सम्मेलनमै आशु चुहाएकी थिइन् ।

त्यसैबेलादेखि अध्यक्ष चिसिएको नेपाल–झाँक्री सम्बन्ध अहिलेसम्म सुधार हुन नसकेको एकीकृत समाजवादीका नेताहरू बताउँछन् । पार्टी नेताहरूसँग बिग्रँदो सम्बन्धसँगै झाँक्री २०७९ मा सम्पन्न संसदीय निर्वाचनमा पराजय भोग्न बाध्य बनिन् । उनी गुल्मी २ मा एमाले सचिव गोकर्ण विष्टसँग पराजित बन्न पुगिन् । त्यसपछि २०८१ असारमा नेकपा एकीकृत समाजवादीको दसौँ राष्ट्रिय महाधिवेशन सम्पन्न भयो । महाधिवेशनमा झाँक्री उपाध्यक्ष पदमा लडिन् । तर, अर्की नेतृ जयन्ती राईले झाँक्रीलाई पराजित गरिन् । उपाध्यक्षमा पराजित भएपछि झाँक्री पार्टी नेतृत्वप्रति असन्तुष्ट बनिन् । त्यसैबेला पुन: महाधिवेशनको माग गर्ने नेताहरुको सूचीमा झाँक्री समेत सहभागी बनिन् ।

बितेको चार वर्षमा राजनीतिक उत्तरचढावसँगै अघि बढेकी झाँक्रीले पछिल्लो शनिबार रुपन्देहीमा दिएको एक अभिव्यक्तिका कारण पुन चर्चा र आलोचित बन्न पुगिन् । झाँक्री शनिबार पार्टी निकट युवा संघको लुम्बिनी प्रदेश भेलालाई सम्बोधन गर्दै थिइन् ।

त्यसक्रममा उनले पतञ्जलि जग्गा प्रकरणमा भ्रष्टाचार मुद्दा खेपिरहेका पार्टी अध्यक्ष माधवकुमार नेपालमाथि कानुनी र संवैधानिक प्रश्न उठेको मात्र बताइनन् नयाँ नेतृत्व चुन्न अर्ली महाधिवेशन गर्नुपर्ने धारणा पनि राखिन् ।

‘अध्यक्षकै बारेमा संकट आयो । अब के गर्ने ? अब के गर्ने भने पार्टीलाई पुनर्गठन गरेर अगाडि बढ्ने हो । संकट आयो भनेर भाग्ने भनेको होइन’, उनले थप प्रस्ट्याइन्, ‘पार्टीलाई पुनर्गठन गरौँ । कसरी गर्ने ? आइदर अर्ली महाधिवेशन गरौँ अर मनोनीत गरेर पुनर्गठन गरेर अध्यक्ष बनाऔँ ।’झाँक्रीको अभिव्यक्ति यतिसम्म त ठिकै हो । तर उनी थप एक स्टेप अघि बढेर अन्य अभिव्यक्ति दिन पुगिन् ।

‘कानुनी, संवैधानिक हिसाबले अध्यक्षमाथि समस्या आयो । अरू कयौँ पार्टीका सदस्यमाथि पनि समस्या आकै छ । अब काँधमा मरेको सिनो हालेर हिँड्न सकिँदैन,’ झाँक्रीले भनिन्, ‘हामी सुध्रिने हो भने नयाँ ढंगले जानको लागि केही डिपार्चर गर्नु परेन ? गरौँ न त अर्ली महाधिवेशन गरौँ । हलबाट नेतृत्व छानौँ ।’

अहिलेकै केन्द्रीय समितिबाट पार्टी नबन्ने र छिटो विघटन हुने भन्दै उनले थपिन्, ‘अस्ति मतदाता नामावली सारेर ल्याएका मान्छेहरूबाट टीका लगाएर बनाएको केन्द्रीय समितिबाट चुनाव लडेर यही पार्टी बनाउने हो भने तपाईँहरू पार्टी बनाउनुहुन्न र यो धेरै छिटो विघटन हुन्छ ।’

झाँक्रीको यो अभिव्यक्तिप्रति सामाजिक सञ्जालमा केही नेताहरूले उनको चर्को आलोचना समेत गरेका छन् भने अध्यक्ष माधव नेपालसहितका नेताहरूले पनि गम्भीर रूपमा लिएका छन् । ‘झाँक्रीको अभिव्यक्तिलाई पार्टीले गम्भीर रूपमा लिएको छ । सायद आगामी बैठकमा यसबारे छलफल होला’, पार्टी उपाध्यक्ष तथा प्रचार विभाग प्रमुख प्रकाश ज्वालाले भने, ‘अर्ली महाधिवेशनको कुरासम्म ठिकै हो तर ‘सिनो’ जस्ता शब्द उचित छैन ।’