काठमाडौंको विष्णुमतीमा गएराति कारसहित बगेकी युवतीको सकुशल उद्धार गरेका स्थानीय तथा प्रहरीहरु सम्मानित भएका छन् ।जिल्ला प्रहरी परिसर, काठमाडौंले उद्धार कार्यमा संलग्न तीन प्रहरी र दुई स्थानीयलाई सम्मान तथा पुरस्कार प्रदान गरेको छ ।
गएराति सवा १० बजेतिर टोखा नगरपालिका–६, ग्राण्डी अस्पतालपछाडि विष्णुमती किनारबाट धुम्बाराहीका अंकुश सिंहले चलाएको बा.प्र ०१–०३१ च ६१४१ नम्बरको कार अचानक खोलामा खसेको थियो । उनी तत्काल गाडीबाट हामफालेर जोगिए ।
तर, खोलामा युवतीसहित कार बगिरहेको देखेपछि स्थानीयले प्रहरीलाई खबर गरे । लगत्तै खटिएको टोलीले स्थानीयको सहयोगमा युवतीको सकुशल उद्धार गरेको थियो । उनी टोखाकी भावना ओली हुन् ।
सम्मान गर्दै काठमाडौं प्रहरीका प्रमुख वरिष्ठ उपरीक्षक (एसएसपी) विश्व अधिकारीले एक डोरीको भरमा आफ्नो जीवन जोखिममा राखेर उद्धारमा खटिएका प्रहरी र नागरिकप्रति धन्यवाद व्यक्त गरे ।
उक्त कार्य समुदाय–प्रहरी साझेदारीको उत्कृष्ट उदाहरण रहेको उल्लेख गर्दै भने, ‘विपद्को समय अत्यन्त कठोर हुने र त्यस्तो अवस्थामा एक जीवन बचाउनुसमेत ठूलो सफलता हुन्छ । जस्तोसुकै संकटमा पनि नागरिकलाई सहायता गर्न प्रहरी सदैव तयारी अवस्थामा रहन्छ ।’
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
