१२ बैशाख गोरखा–बारपाक : गोरखा जिल्लाको बारपाक गाउँ, जहाँ २०७२ सालको भूकम्पले देशलाई काँपाएको थियो, आज फेरि एकपटक ममताको सुन्दर उदाहरणले हर्षित भएको छ।
स्थानीय रोसनी आमाले आफ्नै हातले बुनेको भेडाको ऊनको हाफ कोट नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’लाई उपहार स्वरूप प्रदान गर्नुभयो।
अध्यक्ष प्रचण्ड बारपाक आउने खबर पाएपछि रोसनी आमाले विशेष रूपमा उहाँको लागि यो कोट बुन्न थाल्नुभएको थियो। उहाँ भन्नुहुन्छ, “उहाँ हाम्रो गाउँको पीडा बुझ्न आउनुभयो, म चाहन्थें उहाँलाई हाम्रो माया, हाम्रो श्रमको महसुस होस्। त्यसैले आफ्नै हातले कोट बुनेर दिँदा सन्तोष लाग्यो।”
रोसनी आमाको यो काम केवल एक हस्तकला होइन, यो त्यो ममताको प्रतीक हो जुन बारपाककी आमाहरूले यहाँ आइपुगेका पाहुनाप्रति देखाउँछन्। भूकम्पको बिपत्तिपछि पनि कहिल्यै नथाक्ने, नहच्कने बारपाकवासीहरूको आत्मबल र आत्मीयता अझै उस्तै देखिन्छ।
कोट ग्रहण गर्दा अध्यक्ष प्रचण्डले रोसनी आमाको आत्मीयता र स्नेहप्रति गहिरो सम्मान व्यक्त गर्दै भन्नुभयो, “यो कोटभन्दा ठूलो उपहार अरू केही हुन सक्दैन, जसमा माया, परिश्रम र संस्कार भरिएको छ।”
यो घटनाले बारपाकलाई फेरि एकपटक राष्ट्रिय समाचारको केन्द्रमा ल्याएको छ—यसपटक पीडाले होइन, ममताले।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
