चितवन  : चितवनस्थित क्युएफएक्स जलमा सिनेमाज्को तेस्रो पर्दा शुक्रबार (असोज ३०) देखि सञ्चालनमा आएको छ। नयाँ पर्दा सञ्चालनमा आएसँगै जलमा सिनेमाज्ले तीनवटा अडिटोरियममार्फत दर्शकलाई आधुनिक प्रविधिसहितको चलचित्र हेर्ने अनुभव प्रदान गर्ने भएको छ।

नयाँ अडिटोरियममा दर्शकको सुविधा र रुचिलाई ध्यानमा राख्दै प्रिमियम र प्लाटिनम गरी दुई श्रेणीका सिट व्यवस्था गरिएको छ। कुल २३५ सिट क्षमता रहेको तेस्रो अडिटोरियममा १४ वटा प्रिमियम र २२१ वटा प्लाटिनम सिट रहेका छन्।

विभिन्न श्रेणीका सिट व्यवस्थाले दर्शकलाई आफ्नो आवश्यकता र रुचिअनुसार चलचित्र हेर्ने विकल्प प्रदान गर्ने अपेक्षा गरिएको छ। आधुनिक दृश्य प्रविधि, त्रिआयामिक (थ्रीडी) चलचित्र प्रदर्शन र स्तरीय ध्वनि प्रणालीले दर्शकलाई थप सहज र मनोरञ्जनपूर्ण वातावरण उपलब्ध गराउने विश्वास गरिएको छ।

तेस्रो पर्दा सञ्चालनमा आएसँगै जलमा सिनेमाज् प्रालिको कुल सिट क्षमता ७६८ पुगेको छ। उपलब्ध विवरणअनुसार अडिटोरियम १ मा २६८, अडिटोरियम २ मा २६५ र अडिटोरियम ३ मा २३५ सिट रहेका छन्।

जलमा सिनेमाज्को मुख्य विशेषतामध्ये डिजिटल चलचित्र प्रदर्शन प्रणाली, थ्रीडी दृश्य प्रविधि र डल्बी एटमस ध्वनि प्रणाली रहेका छन्। यी प्रविधिको संयोजनले दर्शकलाई चलचित्रको कथावस्तु, दृश्य र ध्वनिसँग अझ नजिकबाट जोड्ने अपेक्षा गरिएको छ।

डिजिटल चलचित्र प्रदर्शन प्रणालीले पर्दामा स्पष्ट, आकर्षक र जीवन्त दृश्य प्रस्तुत गर्न सहयोग पुर्‍याउँछ। त्यस्तै, थ्रीडी प्रविधिले दृश्यमा गहिराइको अनुभूति गराउँदै चलचित्रको कथावस्तु र घटनाक्रमलाई थप प्रभावकारी बनाउन मद्दत गर्छ। विशेषगरी द्वन्द्वप्रधान, साहसिक, काल्पनिक तथा विज्ञानमा आधारित चलचित्रमा यसको प्रभाव अझ आकर्षक हुन सक्छ।

त्यसैगरी, डल्बी एटमस ध्वनि प्रणाली जलमा सिनेमाज्को अर्को प्रमुख आकर्षण हो। यस प्रविधिले चलचित्रका संवाद, पृष्ठभूमि सङ्गीत र विभिन्न ध्वनि प्रभावलाई दर्शकले फरक–फरक दिशा तथा स्थानबाट आएको अनुभूति गर्ने गरी प्रस्तुत गर्न सक्छ। यसले चलचित्रको दृश्य र ध्वनिबीच सामञ्जस्य कायम गर्दै समग्र अनुभवलाई थप जीवन्त बनाउने अपेक्षा गरिएको छ।

नेपाली चलचित्र उद्योगको विकाससँगै चलचित्र प्रदर्शनको गुणस्तर, दर्शकको सुविधा र आधुनिक प्रविधिको महत्त्व पनि बढ्दै गएको छ। चलचित्र निर्माणमा नयाँ प्रविधिको प्रयोगसँगै त्यसलाई दर्शकसमक्ष प्रभावकारी रूपमा प्रस्तुत गर्नु पनि उत्तिकै महत्त्वपूर्ण मानिन्छ। गुणस्तरीय दृश्य, स्पष्ट ध्वनि र आरामदायी वातावरणले दर्शकलाई सिनेमा हलमै पुगेर चलचित्र हेर्न आकर्षित गर्न सक्छ।

यही परिवर्तित सिनेमा संस्कृतिलाई आत्मसात् गर्दै जलमा सिनेमाज्ले आधुनिक प्रविधि र स्तरीय सुविधामार्फत आफूलाई मनोरञ्जनको आकर्षक गन्तव्यका रूपमा स्थापित गर्ने लक्ष्य राखेको छ। तीनवटा अडिटोरियम सञ्चालनमा आएसँगै दर्शकलाई थप विकल्प उपलब्ध हुनुका साथै चितवनमा चलचित्र प्रदर्शनको क्षमता र सुविधामा समेत विस्तार भएको छ।