एजेन्सी : रुस र युक्रेनबीच हवाई आक्रमण तीव्र बन्दै जाँदा शनिबार दुवै देशमा भएका आक्रमणमा कम्तीमा सात जनाको मृत्यु भएको छ ।युक्रेनमा रुसी आक्रमणबाट चार जनाको ज्यान गएको छ भने रुसमा युक्रेनी ड्रोन आक्रमणमा तीन जनाको मृत्यु भएको अधिकारीले जनाएका छन् ।
जेलेन्स्कीले किएभ, जापोरिजिया, ओडेसा, सुमी र खार्किभ क्षेत्रमा आवासीय भवनहरू लक्षित गरी आक्रमण गरिएको उल्लेख गरे ।
जापोरिजियाको क्षेत्रीय सैन्य प्रशासनका अनुसार ध्वस्त भएको घरको भग्नावशेषमा पुरिँदा दुई महिलाको मृत्यु भएको छ । यस्तै, सुमी सहरमा भएको अर्को रुसी आक्रमणमा दुई जनाको ज्यान गएको स्थानीय अधिकारीले बताएका छन् ।
युक्रेनी ड्रोनद्वारा रुसी रिफाइनरीमा आक्रमण
यसैबीच, युक्रेनले लामो दूरीका ड्रोनमार्फत रुसका तेल प्रशोधन केन्द्र (रिफाइनरी) तथा अन्य औद्योगिक प्रतिष्ठानहरूलाई निशाना बनाएको छ । स्थानीय अधिकारीका अनुसार दक्षिणी क्रास्नोदार क्षेत्रमा भएको युक्रेनी ड्रोन आक्रमणमा तीन जनाको मृत्यु भएको छ भने दुई जना घाइते भएका छन् ।
क्षेत्रीय गभर्नर भेनियामिन कोन्ड्रात्येभले टेलिग्राममार्फत दुई औद्योगिकस्थलमा आगलागी भएको जानकारी दिएका छन् । रुसी सञ्चारमाध्यमका अनुसार आक्रमणको मुख्य लक्ष्य स्थानीय तेल प्रशोधन केन्द्र थियो ।
यसअघि संयुक्त राष्ट्रसङ्घको महासभामा सहभागी हुने क्रममा जेलेन्स्कीले विभिन्न देशहरूलाई रुसमाथि थप आर्थिक प्रतिबन्ध लगाई युद्ध सञ्चालनका लागि आवश्यक राजस्वमा रोक लगाउन आग्रह गर्नुभएको थियो । तर लामो समयदेखि जारी कूटनीतिक प्रयासका बाबजुद युद्ध अन्त्य हुने कुनै स्पष्ट सङ्केत देखिएको छैन ।
किएभमा ड्रोन आक्रमण, आगलागी र क्षति
शनिबार बिहान किएभ क्षेत्रमा भएको रुसी ड्रोन आक्रमणका कारण बोरिस्पिल जिल्लाको एउटा गोदाममा आगलागी भएको छ । उक्त घटनामा दुई जना घाइते भएका छन् । अधिकारीका अनुसार रुसी ड्रोनले राजधानी किएभका विभिन्न क्षेत्रमा पनि प्रहार गर्दा थप चार जना घाइते भएका छन् भने आवासीय र कार्यालय भवनहरूमा क्षति पुगेको छ ।
रुसको रक्षा मन्त्रालयले किएभमा गरिएको आक्रमणबाट मोबाइल इन्टरनेट सेवा तथा स्टारलिङ्क स्याटेलाइट सञ्चार प्रणालीलाई सहयोग पुर्याउने एक डाटा सेन्टरमा क्षति पुगेको दाबी गरेको छ ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
