गैँडाकोट : नवलपुरको गैँडाकोट–२ स्थित गैँडाकोट इङ्गलिस स्कुलका शिक्षकको कुटाइबाट कक्षा ८ मा अध्ययनरत एक विद्यार्थी घाइते भएका छन् । शिक्षकको कुटपिटबाट विद्यार्थीको बायाँ कानको जालीमा ८० प्रतिशत क्षति पुगेको परिवारले जनाएको छ ।
पीडित विद्यार्थीकी सानिमा नन्दिता थापा मगरका अनुसार आइतबार विद्यालयमा पठनपाठन भइरहेको समयमा कपाल काटेर नआएको भन्दै शिक्षकले विद्यार्थीलाई कार्यालय कोठामा लगेर कुटपिट गरेका थिए । कुटपिटबाट विद्यार्थीको बायाँ कानमा चोट लाग्नुका साथै दायाँ आँखाको मुनि निलडाम बसेको उहाँले बताउनुभयो ।
“कुटपिटपछि बाबुको बायाँ कानको जालीमा ८० प्रतिशत क्षति पुगेको अस्पतालको रिपोर्टमा देखिएको छ । दायाँ आँखाको मुनिपट्टि पनि निलडाम बसेको छ,” थापा मगरले भन्नुभयो ।
घटनापछि विद्यार्थीलाई आइतबार नै भरतपुर अस्पताल लगेर स्वास्थ्य परीक्षण गरिएको थियो । सोमबार पुनः भरतपुरस्थित नेसनल सिटी अस्पतालमा परीक्षण गराउँदा पनि कान र आँखामा चोट देखिएको परिवारले जनाएको छ ।
विद्यार्थीका आमाबुबा वैदेशिक रोजगारीका क्रममा जापानमा रहेका छन् । परिवारले विद्यालयमा अध्ययनका लागि जाने विद्यार्थीमाथि नै कुटपिट हुनु गम्भीर विषय भएको जनाएको छ ।
यसैबीच, विद्यालयका प्राचार्य हीरालाल अर्यालले विद्यार्थीमाथि शिक्षकबाट कुटपिट भएको घटना स्वीकार गर्नुभएको छ । उहाँले घटनामा संलग्न शिक्षक डोलराज थापालाई विद्यालयबाट निष्कासन गर्ने र विद्यार्थीको सम्पूर्ण उपचार खर्च विद्यालयले व्यहोर्ने बताउनुभयो ।
“घटना भएलगत्तै अभिभावकसँग एकप्रकारको सहमति गरेका छौँ । विद्यार्थी कुट्ने शिक्षकलाई निष्कासन गर्ने र घाइते विद्यार्थीको सम्पूर्ण उपचार खर्च विद्यालयले व्यहोर्ने भनेका छौँ,” प्राचार्य अर्यालले भन्नुभयो ।
विद्यालयले विद्यार्थीमाथि हुने कुनै पनि प्रकारको हिंसा स्वीकार नगर्ने नीति लिएको उहाँको भनाइ छ । शिक्षकहरुलाई नियमित रूपमा बालमैत्री व्यवहार गर्न सचेत गराउँदै आएको र विद्यालयको नीति विपरीत जाने शिक्षकलाई कारबाही गरिने उहाँले बताउनुभयो ।
प्राचार्य अर्यालका अनुसार शिक्षक थापालाई निष्कासन गर्ने पत्र तयार भइसकेको छ । सोमबार नै पत्र दिएर उनलाई विद्यालयबाट हटाउने तयारी गरिएको उहाँले जानकारी दिनुभयो ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
