काठमाडौँ : रामेछाप जिल्लाको लिखुतामाकोशी–५ निवासी २५ वर्षीया सरिता म्यागेन लामा (घिसिङ) ले विश्वको सर्वोच्च शिखर सगरमाथाको सफल आरोहण गरेकी छिन्। उनले मे २७ तारिखका दिन बिहान ५:१५ बजे सगरमाथाको शिखरमा पाइला टेकेकी हुन्। अदम्य साहस र दृढ सङ्कल्पकी प्रतिमूर्ति सरिताले सगरमाथा आरोहणको पूर्वतयारी स्वरूप सोही वर्षको अप्रिल १० मा लोबुचे हिमालको समेत सफल आरोहण गरेकी थिइन्।
सरिताले आफ्नो यस सफलतालाई नेपालको साहसिक पर्यटन र पर्वतारोहण क्षेत्रको प्रवर्द्धनमा लगाउने लक्ष्य राखेकी छिन् । नेपालमा लुकेर रहेका प्राकृतिक सौन्दर्य र यस क्षेत्रमा रहेका अपार अवसरहरूलाई विश्वसामु चिनाउन आफू प्रतिबद्ध रहेको उनले बताएकी छिन् ।
आरोहणपछि आफ्नो उद्देश्य स्पष्ट पार्दै उनले भनिन्,‘म मेरो यो उपलब्धिमार्फत नेपालको साहसिक पर्यटनलाई प्रवर्द्धन गर्न र विशेष गरी महिलाहरूलाई साहसका साथ अघि बढ्दै असम्भव देखिने लक्ष्यहरू पछ्याउन प्रेरणा दिन चाहन्छु ।’सानै उमेरमा सगरमाथाको सफल आरोहण गरेर सरिताले नेपाली महिलाहरूको साहसलाई पुनः एकपटक विश्व शिखरमा पुर्याएकी छिन्।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
