चितवन : चितवन मेडिकल कलेज (CMC) ले सन् २०२५ मा २ अर्ब ५१ करोड ४० लाख रुपैयाँ आम्दानी गरेको जनाएको छ। यो अघिल्लो वर्षको तुलनामा २७.३५ प्रतिशत अर्थात् ५४ करोड रुपैयाँ बढी हो। सन् २०२४ मा कलेजको सञ्चालन आम्दानी १ अर्ब ९७ करोड ४० लाख रुपैयाँ थियो।
संस्थाका अनुसार बिरामीको संख्या बढ्नु, स्वास्थ्य बीमा कार्यक्रमको पुनः सञ्चालन, क्यान्सर विशेषज्ञ केन्द्रको सुधार र औषधि बिक्री आम्दानीमा वृद्धि भएका कारण आम्दानी बढेको हो।
त्रिभुवन विश्वविद्यालयसँग आबद्ध कलेजले एमबीबीएस, एमडीसहित १४ वटा शैक्षिक कार्यक्रम सञ्चालन गर्दै आएको छ। सन् २०२५ मा कुल आम्दानीमध्ये ६१ प्रतिशत अस्पताल सञ्चालन र ३१ प्रतिशत मेडिकल कलेजबाट आएको छ।
सञ्चालनमा लामो अनुभव भएका अध्यक्ष डा. हरिश्चन्द्र न्यौपाने, सञ्चालक डा. दयाराम लम्साल र कलेजको शैक्षिक गतिविधि निर्देशक डा. गोपेन्द्रप्रसाद देव नेतृत्वमा संस्थाले व्यवसायिक दक्षतापूर्वक स्वास्थ्य सेवा र शिक्षा क्षेत्रमा काम गर्दै आएको छ। नोभेम्बर २०२५ सम्म ८७७ कर्मचारी अस्पतालमा र १३३ प्राध्यापक तथा फ्याकल्टी सदस्य शिक्षा विभागमा कार्यरत छन्।
अस्पतालको ७५० शय्याबाट ५३७ शय्या सञ्चालनमा छन्। चितवन मेडिकलले दन्त चिकित्सा, फरेन्सिक मेडिसिन, नेत्ररोग, सर्जरी, अन्कोलोजी लगायत विभिन्न विशेषज्ञ सेवासहित ICU, नवजात र बाल सघन उपचार कक्ष समेत सञ्चालन गर्दै आएको छ।
संस्थाले १ अर्ब १२ करोड लगानीमा क्यान्सर विशेषज्ञ केन्द्र सञ्चालन गर्दै आएको छ भने विभिन्न बैंक र वित्तीय संस्थाबाट ३ अर्ब ३२ करोड ऋण प्राप्त छ।
साथै, चितवन मेडिकल कलेजले काठमाडौंको तीनकुनेमा ८ अर्ब ४३ करोड लागतमा काठमाडौं इन्टरनेशनल हस्पिटल निर्माण गरिरहेको छ। करिब ३०० शय्याको आधुनिक अस्पतालले राजधानी र आसपास क्षेत्रका बिरामीलाई उच्चस्तरीय स्वास्थ्य सेवा प्रदान गर्नेछ।
अस्पतालको निर्माणमा भौतिक प्रगति ८३ प्रतिशत, वित्तीय प्रगति ७० प्रतिशत, र सेयर पुँजी लगानी ७६ प्रतिशत पूरा भइसकेको छ। सन् २०२६ जुलाईमा १०० शय्यासहित आंशिक सञ्चालन र सन् २०२७ जनवरीदेखि पूर्ण ३०० शय्यासहित सञ्चालनको योजना रहेको छ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
