नयाँ दिल्ली : दिल्लीको इन्दिरा गान्धी अन्तर्राष्ट्रिय विमानस्थलले यात्रुहरूको जानकारीका लागि विशेष एडभाइजरी जारी गरेको छ। शनिबार विमानस्थलले जनाएको छ कि पछिल्ला दिनहरूमा देखिएका अवरोधका बाबजुद उडान संचालन बिस्तारै सामान्य अवस्थामा फर्किँदैछ।

विमानस्थलका अधिकारीहरूले भने कि अझै केही इन्डिगो एयरका उडान प्रभावित छन्। यात्रुहरूले विमानस्थल जानुअघि आफ्नो एयरलाइन्ससँग उडानको पछिल्लो स्थिति जाँच गर्न सल्लाह दिइएको छ। विमानस्थलद्वारा जारी विज्ञप्तिमा उल्लेख गरिएको छ, “हाम्रा प्रतिनिधिहरूले अवरोधहरू कम गर्न सम्बन्धित सबै एजेन्सीहरूसँग नजिकबाट काम गरिरहेका छन्।”

इन्डिगो एयरले शुक्रबार राति सामाजिक सञ्जालमार्फत जारी विज्ञप्तिमा असंख्य उडान रद्द भएको र त्यसले यात्रुहरूमा परेको असुविधाप्रति माफी मागेको थियो। एयरलाइन्सले रद्द भएका उडानका कारण प्रभावित सबै यात्रुहरूको टिकट छिट्टै फिर्ता गरिने पनि आश्वासन दिएको छ।

देशको सबैभन्दा ठूलो विमान कम्पनीमध्ये एक इन्डिगोले केही दिनयता करिब २ हजार उडान रद्द गरेपछि भारतीय विमानस्थलहरू अस्तव्यस्त बनेका छन्। यस कारण हजारौँ यात्रुहरू अलपत्र परेका थिए। कम्पनीले प्राविधिक त्रुटि, प्रतिकूल मौसम अवस्था, कर्मचारी व्यवस्थापन र अप्रत्याशित परिचालन चुनौतीहरूलाई कारण बताउँदै उडान रद्दको निर्णय लिनु परेको उल्लेख गरेको छ।