काठमाडौं : भारतको सबैभन्दा ठूलो एयरलाइन इन्डिगोले पछिल्लो चार दिनयता ठूलो संख्यामा उडान रद्द तथा स्थगित गरेपछि देशका प्रमुख विमानस्थलहरूमा गम्भीर अव्यवस्था देखिएको छ। चालक दलको कार्यघण्टा तथा विश्रामसम्बन्धी नयाँ नियम लागू भएपछि आएको व्यवधानका कारण यात्रुहरू लामो प्रतीक्षा, उडान रद्द, ढिलाइ र जानकारी अभावजस्ता समस्याबाट गुज्रिन बाध्य भएका छन्।

विमानस्थलमा यात्रुहरू भुइँमै बसिरहेको, लगातार घण्टौँ लाइनमा उभिनुपरेको तथा एयरलाइनबाट समयमै स्पष्ट जानकारी नपाएको अवस्था देखिएको छ। सरकारले पाइलट तथा चालक दलको थकान र सुरक्षालाई ध्यानमा राख्दै राति उडान सीमित गर्ने र विश्राम अवधि बढाउने व्यवस्था गरेको थियो।

नयाँ नियमको दोस्रो चरण नोभेम्बरदेखि लागू भए पनि इन्डिगोले आफ्नो रोस्टर प्रणाली समयमै अनुकूल बनाउन नसकेको स्वीकार गरेको छ। बिहीबार मात्रै ३०० भन्दा बढी उडान रद्द भएका थिए भने सयौँ ढिलाइ भएका थिए। नयाँदिल्ली विमानस्थलले शुक्रबार मध्यरातिसम्म सबै घरेलु इन्डिगो उडान रद्द हुने विज्ञप्ति जारी गरेको छ।

अन्य एयरलाइन्स जस्तै एयर इन्डियामा भने यस्तो अव्यवस्था देखिएको छैन। इन्डिगोले दैनिक करिब २३०० उडान सञ्चालन गर्दै ६५ प्रतिशत घरेलु बजार ओगटिरहेको अवस्थामा यसले यात्रामा ठूलो असर पारेको छ।

कोलकाताका ७२ वर्षीय सजल बोस आफ्नो श्रीमतीसँग दिल्ली जाने तयारीमा थिए, तर उडान उडानअघि एक घण्टा अगाडि नै रद्द भएको उनले बताए। “यो अत्यन्तै गैरजिम्मेवारपूर्ण छ। वृद्धहरूका लागि अझ पीडादायी,” उनले प्रतिक्रिया दिए।

इन्डिगोका सिइओ पिटर एल्बर्सले मंगलबार जारी एक आन्तरिक इमेलमा क्षमा माग्दै तालिका परिवर्तन, भीडभाड, खराब मौसम, प्राविधिक समस्या र नयाँ नियमको प्रभावले उडान व्यवस्थापनमा गम्भीर अवरोध आएको स्वीकार गरे।

भारतको नागरिक उड्डयन मन्त्रालयले समस्या एयरलाइनको गलत योजना निर्माण र मूल्याङ्कनका कारण बढेको जनाएको छ। इन्डिगोले पनि चालक दल व्यवस्थापनमा परेको प्रभाव आफूहरूले अनुमान गरेकोभन्दा धेरै ठूलो भएको बताएको छ।

एयरलाइनले नयाँ नियम लागू गर्न अस्थायी छूट मागेको छ र फेब्रुअरी १० सम्म पूर्ण सञ्चालन सामान्य अवस्थामा फर्किने दाबी गरेको छ। आउने केही हप्तामा थप उडान रद्द तथा ढिलाइ हुन सक्ने चेतावनी दिंदै, डिसेम्बर ८ देखि उडान सङ्ख्या घटाएर अव्यवस्था न्यून पार्ने निर्णय गरेको छ।