पोखरा : जेनजी आन्दोलनपछि बनेको अन्तरिम सरकारका प्रधानमन्त्रीलाई तिब्बती धर्मगुरु दलाई लामाले दिएको बधाई सन्देशप्रति नेकपा एमालेले गम्भीर चासो व्यक्त गरेको छ। जानकारहरूका अनुसार, नेपालको इतिहासमा दलाई लामाले कुनै पनि नेपाली प्रधानमन्त्रीलाई बधाई दिएको यो पहिलो घटना हो।
एमालेको गण्डकी सम्पर्क कमिटी र कास्की-काठमाडौँ सम्पर्क मञ्चका प्रतिनिधिहरूबिच भएको छलफलमा यस विषयको समीक्षा गरिएको हो। एमाले केन्द्रीय सदस्य खगराज अधिकारीले उक्त घटना र हालैको राजनीतिक परिवर्तनबारे पार्टीले गम्भीर समीक्षा गरिरहेको बताए।
एमालेले यो घटनाक्रमलाई देशको वर्तमान भूराजनीतिक अवस्था र आन्तरिक सुरक्षाका लागि नयाँ चुनौतीका रूपमा लिएको छ। बैठकले यी विषयमा गहन समीक्षा आवश्यक रहेको निष्कर्ष निकालेको छ।
छलफलका क्रममा देशले सामना गरिरहेका अन्य चुनौतीहरूबारे पनि ध्यान खिचिएको थियो। बैठकमा सिंहदरबार, सङ्घीय संसद् भवनलगायतका महत्त्वपूर्ण संरचनाहरू ध्वस्त पारिएको, जेनजी आन्दोलनले हिंसात्मक रूप लिएको, एक नेताका लागि देशभरका जेलमा तोडफोड गरिएको, पूर्वप्रधानमन्त्री दम्पतीमाथि भएको आक्रमण र सुरक्षा संयन्त्रको उदासीनता लगायतका विषयमा गम्भीर छलफल भएको थियो।
बैठकमा सहभागीहरूले वर्तमान अवस्थामा सबै पक्ष एकताबद्ध भएर अगाडि बढ्नुपर्नेमा जोड दिएका छन्।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
