नयाँ दिल्ली : आइतबार गुरुग्राममा रहेको भारतीय युट्युबर एल्विश यादवको घरमा गोलीबारी भयो । यस घटनामा आक्रमणकारीले २ दर्जनभन्दा धेरै गोली प्रहार गरेका थिए ।
कुख्यात गुन्डा हिमांशु भाउ र उनका साथी नीरज फरीदपुरियाले सामाजिक सञ्जालमा पोस्ट गर्दै यो आक्रमणको जिम्मेवारी लिएका छन् । हिमांशु भाउ अहिले अमेरिकामा बस्दै आएको बताइएको छ ।
त्यहाँबाट उनले आफ्ना गुन्डाहरू मार्फत भारतमा यस्ता आक्रमण गराइरहेका छन् ।
‘जय भोले की...सबै दाजुभाइलाई राम राम । एल्विश यादवको घरमा चलाइएको गोली नीरज फरीदपुर र भाऊ रिटोलियाले चलाएका थिए । उनीहरूले सट्टेबाजीलाई प्रवर्द्धन गरेर धेरै घरहरू ध्वस्त पारेका छन् । अब सबै सामाजिक सञ्जाल प्रयोगकर्ताहरूका लागि चेतावनी छ कि यदि कसैले सट्टेबाजीलाई प्रवर्द्धन गर्छ भने फोन वा गोली जुनसुकै बेला पनि पुग्न सक्छ । तयार रहनुहोस्’ गोली हान्नुको कारणबारे पोस्टमा लेखिएको छ ।
हिमांशु भाउ गिरोहले आक्रमणको जिम्मेवारी लिएको यो पहिलो पटक होइन । पछिल्ला केही वर्षहरूमा यस गिरोहको नाम धेरै ठुला घटनाहरूसँग जोडिएको छ ।
दिल्ली र हरियाणाका धेरै ठुला व्यवसायीहरू यसको हिटलिस्टमा छन् । गोलीबारी भएपछि गुन्डाहरूले प्रायः घटनास्थलमा आफ्नो नाम लेखिएको नोट छोड्छन् । यसले पनि घटना कसको आदेशमा भएको हो भन्ने कुरा स्पष्ट हुन्छ ।
को हुन् गुन्डा हिमांशु ?
कुख्यात गुन्डा हिमांशु भाउ २२ वर्षको उमेरमा अपराधको दुनियाँमा प्रवेश गरेका थिए । उनी हरियाणाको रोहतक जिल्लाको रतौली गाउँका बासिन्दा हुन् । प्रहरी रेकर्डअनुसार उनी विरुद्ध लगभग १८ वटा मुद्दा दर्ता छन् ।
उनलाई गुन्डा लरेन्स बिश्नोईका कट्टर शत्रु मानिन्छ । गुजरातको जेलमा रहेका लरेन्स आफ्नो गिरोहका कारण अपराधको दुनियाँमा सबैभन्दा प्रसिद्ध नाम बनेका छन् ।
२०२२ मा हिमांशु भाउले २४ घण्टामा ३ वटा हत्या गरेर हेडलाइनमा आएका थिए । यो घटनाले हरियाणा र दिल्ली–एनसीआरमा आतङ्क फैलायो । यसपछि उनी नक्कली राहदानीमा विदेश भागे ।
उनको अन्तिम स्थान पोर्चुगलमा ट्रेस गरिएको थियो । विदेश गए पनि उनले दिल्ली, हरियाणा र राजस्थानमा आफ्नो सञ्जाल कायम राखेका छन् । गिरोहले उनकै आदेशमा अपराध गर्छ । हिमांशुका नाममा इन्टरपोलले रेड कर्नर नोटिस नै जारी गरेको छ ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
