काठमाडौँ : नेकपा (माओवादी केन्द्र) की उपाध्यक्ष पम्फा भुसालले वर्तमान सरकारका कदमहरू सुशासनका विरुद्ध रहेको बताएकी छन् ।
आइतबार जनकपुरमा पत्रकारहरूसँग कुरा गर्दै उपाध्यक्ष भुसालले सरकार सुशासनका विरुद्ध अघि बढेको बताइन् । उनले भ्रष्टाचारजन्य, आफ्ना प्रतिद्वन्दीमाथि प्रतिशोध साँध्ने र जनविरोधी कानुनहरू ल्याउनेतिर लागेको आरोप समेत लगाइन् ।
उनले सोही अनुरूप भूमिसम्बन्धी विधेयक ल्याएको बताइन् । सङ्घीयताको कार्यान्वयनका निम्ति बनेको सङ्घीय निजामती ऐनमा राखिएको कुलिङ अफ द पिरियडमाथि छेडखानी गरेर सरकारले अहिले पनि त्यसलाई अगाडी बढाउन ढिलाइ गरिरहेको उल्लेख गरिन् ।
यस्तै शिक्षा विधेयक पनि अड्काएर राखेको उनको आरोप छ । संविधानको मूल मर्मअनुरूप कानुन बनाउने, कार्यान्वयन गर्ने, समावेशी सङ्घीय लोकतान्त्रिक गणतन्त्रलाई बलियो बनाउनेतिर सरकार नभएको उपाध्यक्ष भुषालले बताइन् ।
उनले माओवादी पार्टीले विचार र कार्यदिशा मिल्ने सबै दलहरूसँग एकता गर्नको लागि वार्ता गरिरहेको पनि जानकारी दिइन् ।
एकीकृत समाजवादी, नेत्र विक्रमचन्द नेतृत्वको नेपाल कम्युनिष्ट पार्टी, महेन्द्र यावदले नेतृत्व गरेको नेपाल समाजवादी पार्टी सबैसँग पार्टी एकताको लागी वार्ता चलिरहेको तर निष्कर्ष आउन बाँकी रहेको उनको भनाई छ । यद्यपि एकताको पक्रिया सकारात्मक रहेको उनले बताइन् ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
