काठमाडौँ : देशभरिको कर्मचारी प्रशासनको विभागीय मन्त्रालय सङ्घीय मामिला तथा सामान्य प्रशासन मन्त्रालय मन्त्री विहीन बनेको छ । मन्त्री राजकुमार गुप्ताको घुस अडियो प्रकरण सार्वजनिक भएपछि उनले राजीनामा दिएका हुन् । तर मन्त्रालयमा भने खासै प्रभाव परेको देखिँदैन ।
उनले राजीनामा दिएको केहि समयमा रातोपाटी मन्त्रालय पुग्दा कर्मचारीहरू आ–आफ्नै तालमा थिए । ‘मन्त्री हुँदा पनि खासै केही काम भएको होइन, नहुँदा पनि के हुन्छ र फेरी मन्त्री फेरिरहने कुरा हो । त्यही भएर हामीलाई जो आएनी केही न केही ’ मन्त्रालयका एक महाशाखा प्रमुख भन्छन् ।
‘मन्त्री बिहानैबाट आएका छैनन् । सबै काम गर्ने कर्मचारीले नै हो, नीतिगत निर्णयको बेला मन्त्री चाहिने हो । अरू काम के चाहिँ गर्ने होर ?’ ती कर्मचारीले भने ।
मन्त्रीले राजीनामा दिएको कुरा थाहा पाएपछि सचिव सहित सहसचिवहरू तत्काल मन्त्रालय पुगेका थिए । ‘के थाहा मन्त्रीले बिदाइ खोज्ने हुन् की भनेर कामले बाहिर भएका हाकिमहरू पनि आएका थिए । तर मन्त्री आएनन् । फेरी नयाँ मन्त्री आइहाल्छन्’ एक सहसचिव भन्छन् ।
देशभरका सङ्घीय सरकार मातहत रहेका कर्मचारीहरूको तालुकदार मन्त्रालय भएकोले कर्मचारी प्रशासनको काम धेरै हुने गरेको छ । ‘यो मन्त्रालयमा हुने भनेकै सरुवा र पदस्थापनको काम हो । यसको लागि धेरै काम सहसचिव लेभलमै हुन्छ । मन्त्री आउनु जानुले खासै असर राख्दैन । नियमित काम भइरहेकै छ,’ एक कर्मचारी भन्छन् ।
स्रोतका अनुसार मन्त्री गुप्ता क्वार्टरबाट बाहिर निस्केका छैनन् । उनले भोली मात्रै क्वार्टर छोड्ने स्रोतको दाबी छ ।
यता प्रधानमन्त्री केपी शर्मा ओलीले राष्ट्रिय सभा सदस्य भगवती न्यौपानेलाई सङ्घीय मामिला तथा सामान्य प्रशासनमन्त्री पदमा नियुक्त गर्ने तयारी गरेका छन् ।
‘सामान्य प्रशासन मन्त्रीमा राष्ट्रिय सभा सदस्य भगवती न्यौपानेलाई नियुक्त गर्ने तयारी भइरहेको छ’, प्रधानमन्त्री ओली निकट स्रोतले भन्यो, ‘चाँडै नियुक्तिको पत्र राष्ट्रपति कार्यालय पठाइँदै छ ।’
तनहुँकी न्यौपानेको राष्ट्रिय सभा सदस्य पद ६ वर्षे कार्यकाल पुरा गरेर आगामी फागुनमा सकिँदै छ ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
