काठमाडौं : मातातीर्थ–चोभार १३२ केभी प्रसारण लाइन निर्माण सम्पन्न भएको छ । करिब ६ किलोमिटर लामो उक्त प्रसारण लाइन शुक्रबारदेखि चार्ज गरिने भएको छ ।लाइन सञ्चालनमा आएपछि राष्ट्रिय प्रसारण प्रणालीमा थप वैकल्पिक मार्ग उपलब्ध हुने र काठमाडौं उपत्यका तथा आसपासका क्षेत्रमा विद्युत् माग र आपूर्तिबीच सन्तुलन कायम गर्न थप सहज हुने नेपाल विद्युत् प्राधिकरणले जनाएको छ ।प्राधिकरणका कार्यकारी निर्देशक दीर्घायु कुमार श्रेष्ठले चोभार सबस्टेसन सञ्चालनमा आएपछि उपत्यकाको विद्युत् आपूर्ति थप भरपर्दो र गुणस्तरीय हुने बताए । चोभार सबस्टेसनमा ११ केभीका नौ वटा फिडर रहेका छन् । यहाँबाट कीर्तिपुर, फर्पिङ, पुल्चोक, एकान्तकुनालगायत क्षेत्रमा विद्युत् आपूर्ति गरिनेछ ।
प्राधिकरणले आगामी हिउँदयाममा बढ्ने विद्युत् माग व्यवस्थापन गर्न असोज ८ गते मातातीर्थ–चोभार लाइन १५ दिनभित्र चार्ज गर्ने निर्णय गरेको थियो । लाइन चार्जका लागि चोभार सबस्टेसनमा दुई वटा वे निर्माण गरिएको छ ।चोभारदेखि ललितपुरको लगनखेल (पाटन) सबस्टेसनसम्म करिब साढे ४ किलोमिटर १३२ केभी भूमिगत प्रसारण लाइन निर्माणाधीन छ । पाटन सबस्टेसनलाई समेत १३२ केभीमा स्तरोन्नति गर्ने काम अघि बढाइएको छ ।थानकोट–चापागाउँ–भक्तपुर १३२ केभी प्रसारण लाइन आयोजनाअन्तर्गत ललितपुरको खोकना, बुंगमती, हरिसिद्धी र लामाटार क्षेत्रमा स्थानीय अवरोधका कारण निर्माण अघि बढ्न सकेको छैन । यसले काठमाडौं उपत्यकाको १३२ केभी प्रसारण प्रणालीलाई पूर्ण रिङ संरचनामा सञ्चालन गर्ने योजना प्रभावित हुँदै आएको छ ।
.jpeg)
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
