काठमाडौं : भिजिट भिसा दुरुपयोग प्रकरणलाई लिएर प्रमुख प्रतिपक्षी दलहरूले आज पनि प्रतिनिधिसभाको बैठक अवरोध गर्ने तयारी गरेका छन् । मंगलबार बिहान ११ बजेका लागि बोलाइएको बैठकमा प्रतिपक्षी दलहरूले गृहमन्त्री रमेश लेखकको राजीनामालाई प्रमुख माग बनाउँदै सदनको कारबाही चल्न नदिने रणनीति बनाएका हुन् ।
अध्यागमनका कर्मचारीहरूको मिलेमतोमा भिजिट भिसामा विदेश पठाउने नाममा सर्वसाधारणबाट रकम असुली गर्ने गरेको तथ्य सार्वजनिक भएपछि यो प्रकरणले राजनीतिक वृत्तमा तरंग ल्याएको छ । यस प्रकरणमा गृहमन्त्री लेखकको समेत सम्भावित संलग्नता रहेको आरोप लगाउँदै प्रतिपक्षी दलहरूले उनको राजीनामा माग गर्दै आएका छन् ।
अहिले नयाँ बानेश्वरस्थित संसद भवनमा प्रतिपक्षी दलहरूको संयुक्त बैठक जारी रहेको छ । उक्त बैठकले गृहमन्त्री लेखकले राजीनामा नदिएसम्म सदनमा सरकार र सत्तारूढ दलका सदस्यहरूलाई बोल्न नदिने र सदनको कारबाही अवरुद्ध गर्ने विषयमा ठोस निर्णय लिने बताइएको छ ।
यद्यपि, सोमबार प्रमुख सत्तारूढ दल नेपाली कांग्रेसका सभापति शेरबहादुर देउवाको निवासमा बसेको पदाधिकारी बैठकले भने भिजिट भिसा प्रकरणमा गृहमन्त्री लेखकको कुनै संलग्नता नरहेको निष्कर्ष निकालेको थियो । उक्त बैठकले लेखकले राजीनामा दिनु नपर्ने अडान लिएको थियो । सत्तापक्ष र प्रतिपक्षबीचको यो अडानका कारण आजको प्रतिनिधिसभा बैठक पनि सहज रूपमा सञ्चालन हुन नसक्ने सम्भावना छ ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
