अछाम : चौरपाटी गाउँपालिकामा महिलाहरूलाई सशक्तिकरण तथा नेतृत्व विकाससम्बन्धी विशेष तालिम प्रदान गरिएको छ । महिला विकास शाखाले ३५ जना स्थानीय महिलाहरूलाई तालिम दिएको हो ।
तालिममा सात वटै वडाका महिलाहरुको सहभागिता रहेको थियो । महिलाहरूलाई आत्मनिर्भर बनाउन, नेतृत्व क्षमता अभिवृद्धि गर्न तथा सामाजिक, आर्थिक र राजनैतिक क्षेत्रमा सक्रिय भूमिका खेल्न प्रेरित गर्ने उद्देश्यले तालिमको आयोजना गरिएको हो ।पालिकास्तरीय महिला सञ्जालकी अध्यक्ष क्षेत्र खड्काले तालिमको प्रमुख उद्देश्य महिलाहरूलाई नेतृत्वको भूमिकामा अगाडि ल्याउनु रहेको बताइन् ।
उनले भनिन्, ‘हाम्रो समाजमा महिलाहरूको योगदान महत्वपूर्ण भए पनि नेतृत्व तहमा उनीहरूको प्रतिनिधित्व कमजोर देखिन्छ । यस तालिममार्फत हामी महिलाहरूलाई आफ्नो हकअधिकारबारे जानकारी गराउँदै समाजमा निर्णायक भूमिकामा स्थापित गर्ने प्रयास गरिरहेका छौँ।’तालिममा नेतृत्व विकास, आत्मविश्वास अभिवृद्धि, निर्णय क्षमताको विकास, आर्थिक सशक्तिकरण तथा महिला अधिकारसम्बन्धी विभिन्न विषयमा प्रशिक्षण दिइएको थियो ।
तालिमको समापन समारोहमा प्रशिक्षकहरूले महिलाहरूलाई सिकेका कुराहरू व्यवहारिक रूपमा लागू गर्न आग्रह गरेको बताइएको छ । माघ १५ देखि १७ गतेसम्म चलेको तालिमका प्रशिक्षक प्रेम बुढा र रुपा आउजी थिए ।तालिम समापन समारोहमा गाउँपालिकाका अध्यक्ष भीम बहादुर साउद, पालिकाका कर्मचारी र जनप्रतिनिधिहरुको सहभागिता रहेको थियो ।
© 2026 All right reserved to saurahaonline.com | Site By : Sobij
© 2026 All right reserved to saurahaonline.com | Site By : Sobij
